هذي بقرة وذاك ثور

من يومين كنت عند امي الغاليه  الله يحفظها ويطول بعمرها

وكان بيدها ماعون  فيه شوية قواقع مجمعتهم من البحر مغسلتهم ومنشفتهم وتبي تحطهم بغرشه طويل للزينه

قعدت جمبها اتطمش واتفحص  اشكال القواقع الحلوه وقلت ماشاءالله يمه منقيتهم نقوه

جان تقولي الوالده  هذي بقره وذاك ثور

ضحكت وقلت شنو؟ ردت علي  وهذا ديج وهذي الديايه ,ون جانج شاطره طلعيلي السخلة

قلت يمه هذي قواقع مو حيوانات مزرعه

ردت علي بوجهها السفر وقالت اي كنت أربيهم بحوش الغنم مع الحمام والبش

قلت يما من صجج؟

قالت اي من صجي اول يوم انا ياهل  لي يو ربيعي الصغار كنا نلعب البروي والقواقع العابنا

قلت يما انا خبري البروي  سحارة ومتروسه خرق وانت علمتيني عليها يوم انا صغيره

واذكر حطيت فيها باربي بس باربي كانت تبي غرفة نوم وغرفة طعام لويكان

جان ازعل زعلة قشره ولا رضيت الا لما شريتيهم لي

قالت الله يحفظها اي اذكر زين يوم ما فشلتيني بالشارع وقعدتي بالارض تصيحين تبين أثاث  باربي

ضحكت وقلت لها لا تلوميني يما  زوغوا قلبي غرفة نومها و البوفيه والطاوله لويس السادس عشر  وصحونها جنها صيني منقوش  وشوك ومعالق جنها فضه وقلاصاتها جنها كرستال فرنسي

ردت علي وقالت على هالشي الي كنت  اجيبه حقج  حافظتي عليه؟  لعبتي فيهم وغليتيهم وضيعتيهم (قطيت راسي من الفشله )خلف الله علينا ايامنا غير  يا بنيتي

صج  البروي عباره عن بيت نسويه من سحاره عتيجه  و نزينها بفضلة الخامات بس نحط فيه مطبخ ونحط فيه صحون وغناج من القواقع , وحوش للغنم نحط فيه سخول  وبقر وثيران ودجاي ودياجه وبش وكله من القواقع

هذي كانت ايامنا وهذي العابنا على قدنا , بس نفرح فيهم فرح  ونحس  انا نملك الدنيا بلي فيها , الحمد لله والشكر

قلت ياحلوج يمه وياحلو ايامكم الحلوة  البريئه

وقعدت امي  تحفظني  اشكال القواقع وأساميهم  وكتبت على كل وحده اسمها

وقلت لازم مايضيع هالتراث الطفولي  الجميل

من مجموعتي المتواضعة , بقرتين و4بشوش و4 حمامات وديج رومي وسخلتين و3 دياجه ودجاجه وحده واربع صحون

عاد انتو ( فرزنوهم ) تعرفون معناة هالكلمه؟

الله يطول عمرج يايما الغاليه ويرزقج الصحه والعافيه وتقصين علي حزاويج وقصيصج  الحلوه

ومشكورين بناتي ان فتحتوالي بلوغكم الحلو اكتب فيه

عفيسة

Advertisements

About roashina

Ladies from k-town with different tastes that are willing to share interests and thoughts during their daily life.
This entry was posted in Entertainment, Games, Kuwait, Uncategorized and tagged , , , . Bookmark the permalink.

One Response to هذي بقرة وذاك ثور

  1. Pingback: Tweets that mention هذي بقرة وذاك ثور | Roashina -- Topsy.com

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s